حزب الراقدون تحت اللحاف ورجاله احنا اسفين يا شفيق

اهم الدروس الى استفدتها من الفيس بوك ان عدد الاصدقاء مش مهم اهم شئ هو عقليات الاصدقاء فصديق عاقل خير من 500 احمق ودايما لما كنت بانزل ستاتس او فيديو او صوره او وثيقه كنت بالاقى ردود الافعال والتعليقات بتتباين لان الناس انواع والاختلاف الحميد مطلوب ولكن كان عندى مجموعات ملاحظات

الاولى   وهى المجموعه المفكره العاقله التى تسمع الفيديو او تقرا الحاله وتحاول ان تفهم قبل ان ترد عليها او ان تعرف مضمونها ودول قله قليله جدا الا من رحم ربى ودول كانوا بيردوا ردود موضوعيه وممكن يضيفوا لك وجهه نظر كانت غايبه عنك وللامانه دول اغلبهم كان مع الثوره من بدايتها لنهايتها وان اختلفت الاراء والتوجهات دول الناس الى بتفكر وتعبانه وتفكيرها هداها ان مصر مش هتبقى احسن غير لو اتخلصت من المافيا العميله المسيطره على مقدراتها ودول بيتلخصوا فى شباب 6 ابريل الذين لا انكر اننى كنت احد المتعاطفين معم المشتاق الى فيديو من فيديوهاتم وحركه كفايه ودى فنانين وناس مبسوطه ماديا  وقضاه ودكاتره ومهندسين ناس مش محتاجه غير انها تشوف مصر احسن بس وحركه الحقوقين الذين يبحثون عن حقوق الانسان المهدره واغلب الاخوان والشباب

الثانيه وهى الناس التى تعلق بطريقه كوميديه وانا واحد من دول بتاخد مننا احسن كلام وعمرك ما بتلاقى فعل نبحث عن الواقع بالنت واحنا بصراحه بنقول كلام زى الفل وبنفهم ومستعدين نشارك بكامل طاقتنا بس معندناش استعداد نضحى زى الناس الى فوق بس بنحترمهم وندافع عنهم تقدر تقول صحفيين الثوار والمدافعين عنهم كان نفسنا نبقى ايجابيين اكتر بس الخوف بيشل تفكيرنا شويه

الثالثه وهى حزب المتفزلكين المتفلسفين الذين يحاولون ان يكونوا مع العايمه بينقلوا اى اشاعه وخلاص كوبى باست الفيس بوك هيقفل 15 مارس لو مبعتش 500 وماما زمانها جايه وارسلها لبكار لترى مازنجر بالالوان ولو عددنا وصل مليون هنبقى جامدين اخر 3 حاجات شباب تافه ولا يفكر يجلس امام الكيبورد عشان يرجع علينا كلامنا ولما نرد ما بيقراش تحس انه اهبل او اهبل او اهبل حاجه كده يقعد يقولك لا للفتنه لا للبطاطس لا للبطيخ يبنى افهم مليش دعوه انا لسه قاريها بالنسبه له لو حد قاله امك مرات ابوك يبقى حقيقه  وامر واقع واسرائيل حرضت على الثوره عشان فيه تيار هناك بيحب مصر وكده يعنى اى كلام فاضى معقول ودول الواحد تعب منهم بجد دول بقى يا يرحمونا ويسكتوا يا ما يرحموناش ونقعد نرد عليهم هم عاملين زى جمهور الاتحاد السكندرى الى بيقول الاتحاد سيد البلد وماشيين فى اى زفه وخلاص كوبى باست من غير تفكير

الرابعه   وهى المتحولون او الهتيفه او راكبى الاكتاف وما اكثرهم الواحد منهم بتاع مناصب واعارف انه بتاع مناصب ويقولك باحب مصر ودول بقى زى قيادات الاعلام رجال الحزب الناصرى الى حمدين صباحى تعب منهم وعمل حزب اسمه الكرامه ورجاله الوفد الحرس  القديم دول بيقولوا انهم بيحبوا مصر عشان بيحبوا يطلعوا فى التلفزيون ودول احسن حل ليهم التجاهل والتسفيه لانهم بيتكلموا كويس اوى بس كدابين اوى كلامهم بيتغير حسب درجه حراره الجو وابرزهم مصطفى بيه بكرى بتاع الاب الرئيس الراجل ده بقى غريب وعجيب جدا انا فاكر انه اول من فضح حسن الالفى بوثائق جابها منين؟؟؟؟؟؟؟؟ وحبيب العادلى كان مدير مباحث امن الدوله ايامها اكيد من بسبب علاقاته الجهنميه وخبطاته الصحفيه قدر يدين وزير الداخليه من غير ما حد يعرف ما هو واعى وفجأه بعد حملته المنظمه حدثت احداث الكرنك الى مات فيه 100 سائح التى لا استبعد انها اكتمال لمثلث فساد الالفى ليركب العادلى الكرسى وابقى ادينى لفه يا عمو قام ماسك مجلس شعب دورتين وكان خلالهم يهاجم كل معارض يهاجم عز او الريس او حبيب وعامل مناضل مش قلتلكم هتيفه بقى والغريبه انه عمره ما هاجم الريس هوب ستوب لقى وثيقه محدش عثر عليها غيره بحساب مرات ابوه اسف الريس ما هو كان بيقول الاب بتقول ان مكتبه اسكندريه حسابتها بتاعتها وماله يا عم انت شاطر ومعلم من يومك بس انت بتجيب الكلام ده منين والرجاله المتحولون كثيرون ويرتدون الاقنعه ومنهم كل رؤساء التحرير القوميين ومعاهم عمو خالد صلاح صاحب اليوم السابع المملوكه للراجل ممدوح بتاع العباره الى ابدع عندما قال جمله ستدرس فى كتب التاريخ فى مكالمته مع عمرو صفوت الشريف قال يا باشا لازم نضحك على الناس بخبرين سخنيين وبعدين نوجههم للمكان الى احنا عاوزينه

الخامسه حزب المتواطئين  ودول بقى بتوع مليش دعوه انا عاوز اشوف الراجل الى كان فى التلفزيون امبارح طنط المذيعه قالتلى حلو طيب اسمه ايه مش فاكره وعاوزه اقوله انا اسفه يا عمو وخلاص ودول بقى بينتشروا زى الصراصير فى الاماكن العفنه فكريا وتلاقى كلامهم كله من نوعيه ده زى ابونا ده راجل كبير طيب يبنى دا فيه ناس ماتت وهو نايم مليش دعوه ويخبط برجله فى الارض ودول بقى ما بيسمعوش غير المحور بتاع حسن راتب والحياه بتاع السيد البدوى وهكذا هم بيصدقوا كلام طنط اميمه وعمو تامر وخيرى الى زى السم لانهم لا يفكرون يسمعون فقط كائنات غريبه

السادسه ودى ناس بقى مبطرخه ومتضبطه وميه عيال بقى من بتوع لجنه السياسات الى بياخدوا فلوس على كل اكونت باسم مزه وضباط امن دوله ومخبرين وامناء شرطه من اياهم ودول بقى يا ولداه قاعدين فى البيت يشتموا ويطلعوا القطط الفطسانه فى كل واحد الواد وائل غنيم ماسونى ايرانى يابانى امريكى روسى مشترك محسسنى انه محطه افضاء الروسيه مير والغريبه ان طريقتهم ثابته ولا تتغير ويصدقهم الرعاع ومستجدى الفيس بوك والعيال بتوع انا اسف بينقلوا منهم برضه ودول بيقولوا اى كلام بس لو رديت تبقى غلطان لان محدش هيقرا لان اغلبهم عارف طريقه وثابت عليه دول مصرين على المعصيه وعارفين بيعملوا ايه فما تتعبش

نفسك اعمل ابلاغ ويرحمكم الله عشان ما حدش يشتمك

ا

السابعه حزب المصالح الشخصيه الضيقه ورافضى التغيير وخلاص دول بقى هم الخطر بجد لانهم كتير وقد سماهم واحد صاحبىىا

الراقدون تحت اللحاف  وسماهم  عمرو سلامه تحت خط الفكر ودول عاوزين اى زفه وخلاص وبيتكلموا كلام كبير وملوش معنى زى الدفاع عن الاسلام ازى حضرتك بعدم الخروج عن الحاكم وواحد تانى جاى من امريكا  بتاع مش عارف ايه المهجر يقرفنا ويولع البلد ومش قادرين ننتقده  عشان الفتنه بس والله ومفكر انه كده كويس يعنى واخدها عافيه وكدب وتهويل مع اننا بنحب بعض عشان مصريين بالتسامح مش بالشعارات الدينيه  وهاقتبس جزء من مقال سابق عشان تعبت من كتر الكتابه بصراحه

ايها الراقدون تحت اللحاف ارحمونا بقى

 قبل الثوره قلتوا على الى بيعتقل يستاهل عيل قليل الادب بيتكلم فى السياسه

والثوره شغاله قلتوا عاوزين يولعوا البلد

ولما الضرب اشتغل قلتوا شوفتوا البلد بتولع

ولما اترمى لكم عضمه قلتوا كفايه عليكم كده

ولما العضم كتر قلتوا انتوا طماعين انتوا عاوزين لحمه

ولما خلاص كل المطالب اتحققت اتاسفتوا للكلب واهنتوا الى واقف وما خافش يتعض ط\

ارحمونا بقى الفرح فرحنا والفرحه فرحه مصر عاوزين تيجوا ترقصوا تعالوا ارقصوا زى ما بقى لكم 60 سنه بترقصوا على جثث اولادكم وضياع حقوقكم

بس المره دى الفرحه ليها طعم فرحه حريه

تعبانين وحاسين ان المزيكا عاليه سدوا ودانكم وغموا عينيكم الى مش قادره تتحمل النور زى ما غطيتوا عينيكم وسديتوا ودانكم 60 سنه قبل كده

واخيرا وليس اخرا هناك فرق بين من لعب واثر وحرك القوى السياسيه وساعدها ووقف منذ البدايه فى الخندق وخطط وساعد بخطط جديده فى الثوره

وبين من انتظر طويلا على الخط ليشارك الفريق المنتصر افراحه وتحمله الجماهير على الاعناق بعد ان كان احد الشاهدين على ظلم الحكم واكثرهم عشقا لظلمه لانه كان سيصوت للرئيس مبارك لانه يعرفه جيدا  

مقال نشرته لاول مره يوم 15 مارس 2011
ووجدت انه يصلح للنشر حتى الان
https://www.facebook.com/notes/%D8%AF%D9%85%D8%B5%D8%B7%D9%81%D9%89-%D8%AF%D8%B3%D9%88%D9%82%D9%89-%D8%A8%D8%B8%D8%A7%D8%B8%D9%88/%D8%AD%D8%B2%D8%A8-%D8%A7%D9%84%D8%B1%D8%A7%D9%82%D8%AF%D9%88%D9%86-%D8%AA%D8%AD%D8%AA-%D8%A7%D9%84%D9%84%D8%AD%D8%A7%D9%81-%D9%88%D8%B1%D8%AC%D8%A7%D9%84%D9%87-%D8%A7%D8%AD%D9%86%D8%A7-%D8%A7%D8%B3%D9%81%D9%8A%D9%86-%D9%8A%D8%A7-%D8%B4%D9%81%D9%8A%D9%82/176487062397474