يا عم انا مالى سيبنى فى حالى

يـــاعـــم انا مالـــى سيـــبنى فى حالــــى 

يـــاعـــم اســــمـعنى 

هتقـــــــــــول ايـــــه يعـــــنــــــــــــــــى 

هاحكى حكايه ارضى الحـره

طيــب احــكى بــس بســــــــرعه

الحكايه حكايه ارض ملكها الجدود جه حرامى راح واخدها وورانا العقود

وأنـا وانت راح نفكر أزاى نعود 

طيب وانا مالى ما تسيبنى فى حالى؟

ازاى يـــا صاحبــــــــــــــى دى الأرض أرضــك والعـــرض عرضــك

ازاى تسيـــــب ارض الجــــدود ازاى تقــــول انــــا هاعمـــــل ايــــه

طيــب قـولـــى أنـــت هنعمـــل ايـــه؟

نـزرع الحـب فى قلـوب كـل الولاد عشــان يقـوموا ويطلبـوا زمن الجهاد

ويحلفوا يعيشوا العمر كله فى حداد لحــــد مــا يرجعـــوا لينــا كل البــلاد

يــاعم انـت بتقـول الكــلام ده لمين؟

هوانت فاكران البلاد دى لسه فيها مسلمين الناس يا صاحبى فى الزمن ده ملهموش دين

جابوا العدو وسط البلاد يقعد سنين

علفـــوه وربــــوا ليــه شنــــب ادوا لــــه كــــل مــــا طلــــــب 

من دمنــــا كمــــان شــــــــرب وبلـــــد الخـــــــليفه اتخــــرب

والـــــى يقـــــــاوم ينضـــــــرب بفلـــوس اخــــوه من العـــــرب

نفسى اقولك حاجه واحده يا صاحبى العرب جرب

بتقول نربى الحب فى قلوب كل الولاد عشان يقوموا ويطلبوا زمن الجهاد
طــب فيـــن العــدو وفيــن الحبيـــــب فيــــن الغـريـــب فيــــن القــريـــب
بتقــول يـا صــاحبـــى أنــى سلبـــى سيبنــى الجــراح كتيــر فى قلبــى
دا القـدس ارضـى وســـوريا حبـــى بغـــداد حبيبتــى لبنـــان دى بلـــدى
سودان وليبيا ضاعوا فى لوكيربى
مـش بالكــلام هنعـــود يا صـاحبــى لازم نطهــــــر قلبــــــك وقلبـــــى
مـركبنا واحــده اهـــدافنـــا واحـــده لازم تكـــون كلمــتنـــــا واحـــــده
لازم نشيــــل جــــــذور الخـيـــانـــه بــلاش نقــول شعــارات جبــــانـه
لازم نعـــــــود احســــــن ديــانــــه شعـــارنــا الجهـــاد مـــع الامـانــه

حريه ديمقراطيه ملوخيه كوسه وبطاطس مقليه

حريه ديمقراطيه ملوخيه

                              كوسه وبطاطس مقليه

 فيه ناس كتيرملهيه

                            طالبين مساعدات دوليه

بتقول بلدنا فى مصيبه

                                 وفيها ازمه اقتصاديه

ازمتنا فى الى قاعدين فوق

                                ناهبين بلدنا الحراميه

ادى تصريحات وكلام معسول

                       عن اعلى نهضه تاريخيه

ومسلسلات وكلام معقول

                          ومعدلات فوق قياسيه

وكل يوم اقرا الجرنان

                          اشوف بلادى دوله غنيه

اشوف جنيهى ابات زعلان

                             دولار باسعار خياليه

اشوف شبابى ابات قهران

                                  بطاله بعد الكليه

بتطالبوا ليه بجذب الاموال

                    وامواكو فى بنوك غربيه

تهليب وسرقه ليل ونهار

                             مع ادعاء حسن النيه

تحطيم لكل رمز شريف

                            لسه فى دماه الوطنيه 

مع تحيات د/مصطفى بظاظو

ان يكون مصير شعب مربوط فى رقبه حموكشه

زمان اول ما اشتغلت فى صيدليه اول درس اتعلمته ان لو حد مدمن دخلى الصيدليه اكلمه باحترام ولا اثير غضبه وفى نفس الوقت لا اعطيه ما يريد 



واحاول ان اخرج من تلك المعضله باقل الخسائر لان تفكير هذا الرجل لا يخضع لحسابات القوه التقليديه فممكن مثلا اقوله مفيش  وانجز ياعم الكتكوت  


يقوم غززنى غزه او يستنانى بره وابقى دكتور ببشله وحتى لو قتلته انا الخسران لانه ليس لديه شئ ليخسره فهو فى عالم الملوخيه من اول النهار 


ومش عاوز يطلع منه فلابد ان ياخذ ما يرضى غروره

او اخوفه بالبيه الضابط قريبى او بصاحبى الجامد ابو مطوه

وفى مصر عندما تفتق وعيى على الحياه السياسه جلست حذرا ارقب التيارات المختلفه واتأملها وعرفت ان اهم حاجه ميكونش عندك ملف امن دوله 


ولا تبقى اخوان واتكلم فى السياسه براحتك لكن اهم حاجه تحلق دقنك بانتظام وما تسيبهاش تتطول حتى لو جوز عمتك مات والحاجه التانيه تعرف 


الدبوس بتاع الامن فى الكليه او فى الشارع وبالمناسبه بيبقوا واضحين جدا واشتم الريس براحتك فى كل حته لكن قدامه اتكلم على الريس زى 




العيال الى بيقولوا بابا حسنى لان الى بيقع محدش بيقول عليه بطل دا الناس بتتريق عليه وبيبقى مسخره يعنى الطريقه سهله ما تربيش دقنك وما 


تشتمش الاهبل ولا تخلى الاهبل يشتمك

مهما كنت مناضل وعاوز حريه براحتك بس من غير ما تعمل فرود يعنى تبقى زى عمرو اديب اشتم كله وقول الكبير صمام الامان وساعات برضه كنت 


ابقى متاخر بالليل واوقف تاكسى او ميكروباص والاقى السواق رايح فى داهيه وليلته مش فايته فكنت اصبر نفسى لغايه ما اوصل يا ادفع الاجره 


واقولك على جنبى ونبى يا باشا من غير ما احسسه انى خفت نلبس فى شجره مع ابتسامه عريضه مرسومه على وجهى علامه الارتياح لما كنت 


اشوف ضابط او عيل سيس من بتوع الحزب الوطنى كنت الف من الشارع التانى واعمل مش واخد بالى عشان ما انافقش او اعمل دكر فابقى سميحه 


لكن صراحه بقى الى عمرى ما تخيلته ولا تصورته بجد ان الواد حموكشه بتاع الترامادول الى كان بيتحايل عليه كل يوم وانا اعمل عبيط ومش عارف هو 


بيتكلم على ايه يدخل عليه الصيدليه مره ماسك رشاش ويقولى هات الترامادول يا  تيييييييت معلش مش هاقدر اقولها عشان الرقابه ولا بقى لو وقف 


على باب الشارع كل يوم بالرشاش وقعد يقولى فين الترامادول ساعتها كنت ممكن اغير النشاط او اهرب على شارع تانى وابيع الصيدليه لاى حد تبع 
حموكشه

تعالوا نتخيل معاناه الشعوب العربيه او الشعوب الى بتعانى من الديكتاتوريه بمسميات مختلفه وبغطاءات مختلفه منها الدينى ومنها الوطنى او 


العسكرى او الميراث  ومنها الاستقرار والاستحمار  بص على اليمن تلاقى الحاج على بيقولك انا مبقبل اى حد يجى يقعبذ على الحكم على اساس 


انه حاكم شرعى ديمقراطى وفى سوريا بشار بيقتل شعبه ويقول شعبى وانا حر فيه اغسله وافرده واكويه اما المعاناه الكبرى الى نتجت نتيجه 


الحمكشه وافرزت لنا عميد الحموكشات العرب وملك ملوك الحموكشيه والحموكشيه دى فى التاريخ انشاء الله هتبقى حاجه كده بعد الحقبه 


الاستعماريه هم ضحكوا علينا زمان وقالولنا حقبه الاستقلال لكن اتضح انها الحقبه الحموكشيه من اربعينات القرن العشرين الى الان وربنا ييسر 


وتنتهى بقى 

 و تعالوا بقى نتخيل معاناه الشعب الليبى الواد حموكشه صحوا من النوم الصبح لقوه بقى قائد وزعيم وبيتكلم فى كل حاجه وعاملهم كتاب لون حبوب 


الترامادول اخضر يعنى وممعهوش سنجه ولا مطوه ولا رشاش دا معاه مدافع وصواريخ وفلوس وجاز وحاجات ياما وطبعا الى بيتكلم ولا يقول يا باشا 


عاوزين مبيكملش الكلمه يعينى بيروح حته بيقولوا انها ورا الشمس المشكله الخطيره فى الواد حموكشه انك لا يمكن تتوقع رد فعله فاسهل حاجه 


انك متعديش من منطقته ولو عندك حاجه بتاكل منها عيش روح منطقه تانيه الواد حموكشه ولا بيهمه فلوس ولا بيهمه سلاح ولا اى حاجه الحاجه 


الوحيده الى تهمه انه يعمل اصطباحه فل وانك تضرب تعظيم سلام اول ما تشوف صورته وكل ده مش مشكله لكن المشكله انك تفتح التلفزيون تلاقى 


شيخ او قسيس  بدقن مترين وكنت بتحبه جدا وتلاقيه بيقولك الدين  بيقول ان طاعه حموكشه واجبه طيب انا عارف وكاتم فى قلبى انى خايف من 


حموكشه عشان حموكشه جامد ومتاكد انى لو اتكلمت هيضبطنى لكن كمان لو جمدت قلبى وقلتله عيب يبقى حرام واستاهل الى يجرى

لى  دا كتير قوى يا عم يا بو دقن انت

   لا وبعد الراجل ابو دقن  ما يخلص هوب ستوب تلاقى مزتين لووووووووز قاعدين يرقصوا رقص جامد ويقولوا يا حموكشه يا سيد الناس لو غبت عنا 


بنحتاس طيب مش مشكله يا عم دول مزز وناقصات عقل ودين تقلب على قناه تانيه يمكن تلاقى حد بيتكلم عن اى حاجه تانيه تلاقى المذيع جايب 


ضيف مثقف ومعاه دبلومه حموكشه فى العلوم الحموكشيه وعمال يقول ان حموكشه يمثل نقطه محوريه فى تاريخ دوله حموكشستان حيث ان 


تواجده يمثل اتزان جيوفيزيقى لكل المنطقه لانه بصراحه كده مبيهموش ومستعد يحارب حتى اخر جندى عنده واذا مات حموكشه فكلنا حموكشه 


وليبق كل فى مكانه ان مات حموكشه فكلنا حموكشه تبص يمين تلاقى اخواتك بيعيطوا خايفين على حموكشه الى بن خالتهم لسه ميت فى 


المعتقل من اسبوع عشان قال حموكشه وهو نايم فقالوا ازاى يحلم بحموكشه حلم وحش فتلاقى نفسك بتصقف وتعيط من حسرتك على العقليات 


الى جنبك وبدون شعور تلاقى نفسك بتقول كلنا بنحبك يا حموكشه والدموع عماله تنزل من غير ما تعرف سبب نزولها هل هو خيبتك القويه الى خلت 


حموكشه بقى مثلك الاعلى ولا الرجاله الى عارفه ربنا الى اصبحت تسبح بحمد حموكشه وتكفر من لا يسبح بحمده ولا مثقفى البلد الى كل الى 


يعرفوه تاريخ حموكشه ولا ايه ولا ايه 

 الخلاصه مشكله حموكشه تتلخص فى ان الراجل كان كل الى عاوزه حبايه ترامادول ومزه وشويه مزاج بص لقى نفسه معاه رشاش وتحت ايده رجاله 


كدابه وشويه حراميه وشويه خوافين بيقولوا له احنا اسفين يا صلاح والرجاله فى الحتت الى جنبه بيسمعوا كلامه وما بيردوش يردوا له كلمه عشان 


خايفين على لترين البنزين الى بيروحوا لهم يقفوا ولا حد تانى غير حموكشه يمسك بركه الجاز ويعرف فايدتها فيعمل مصانع وحركات ويبطل يبيعلهم 


الجاز وياخد بداله سنج ومطاوى لزوم تربيه ولاد الحاره مشكله حموكشه الحقيقيه فى انه ظل يكذب وهو عامل مزاج عالى حتى صدق نفسه فصدقه 


مجتمع جبان واصبحوا رجاله لانه ولى الامر الذى يتلقى اوامره من الذات الالهيه وانه ايه الله حموكشه  وطبعا الرجاله دى هتهاجم اى تغيير يحصل 


لانهم ببساطه جبناء وهيحاولوا يخلوا اى تغيير يحصل يكون فى صالحهم لان الكداب الى سكت وخلى الباطل حق 30 سنه او 40 سنه مش ممكن 


يسكت دلوقت لان ابو بندقيه مشى وهو لازم يحاول يكون ليه دور ولذلك اطلب من اخوتى فى الله ان يحذروا من اتباع حموكشه  والناس الى لسه 


بتقول احنا اسفين يا حموكشه والناس الى قعدت ساكته وقعدت تقول حموكشه رمز الاستقرار لا لانهم اقوياء لكن لانهم قد يصنعوا حموكشه جديد 


يقتل ويسرق وينهب مع وجود تبريرات

اما بالنسبه لحموكشه بتاع البلد الى جنبنا الى جابه اول حموكشه كان عندنا لما السنوسى زعل مننا فانا انصح الولايات المتحده والعرب وكل الدول 


الى عاوزه تحل المشكله بسرعه انكم تمنعوا الحشيش والترامادول عن ليبيا وبالطريقه دى هيضطر القائد يهرب لانه ميقدرش يعيش من غير مزاج ولو 


ليوم فقدامكم حل من 2 يا تحاربوا حموكشه يا تمنعوا المزاج عنه    

قطار التغيير وحزب الراقدون تحت اللحاف

اول حاجه  اتعلمتها وانا صغير لما كنا بنلعب كوره ان فيه ناس بتقعد على الخط تتفرج ولما الفرقه تكسب يقولك مش انا الى قولتلك تلبس الشورت الاحمر وشه حلو وبعد شويه يقولك فرقتنا كسبت امبارح وبعد اسبوع يقولك كسبنا عشان احنا حريفه  دا طبعا فى حاله المكسب حيث ان الانتصار له مائه اب

اما بقى لو خسرت فالناس دى اتوماتيك بدون ما تشعر بتنقسم الى 3 فرق الفريق الاول بيروح يجرى على الفرقه التانيه ويقول نفس الكلام الى كان بيقوله معاك كسبنا واحنا السبب وكده

والفريق التانى بيقعد يندب حظه انه اعتمد على شويه عيال مش فاهمه اى حاجه فى البطاطس وانه لازم يدور على فرقه تانيه تكون احسن

 والفريق التالت بقى وهم الاغلبيه بيقعد يتريق عليك وانت رايح وانت جاى ايه يا كابتن خسرت ليه مع انه شايف الحكم وهو بيطردلك 4 لعيبه قبل الماتش بس هو  ملوش دعوه هو عاوز يتسلى وخلاص حتى لو كان دافع دم قلبه عشان يجى يشجعك مع العايمه يعنى وبيقضى لحظات سعيده

لكن الدرس الوحيد الى اتعلمته من الموضوع ان هناك من يصنعون الفارق ويصنعون الاحداث على ارض الملعب وهناك من يظلون طول عمرهم قاعدين على الخط يتفرجوا وملهمش دعوه باللى بيحصل وساعه الماتش ما بيخلص بيشوفوا مين الى كسب ويجروا يهتفوا له

فى الثوره المصريه وما تبعها من احداث كنت قبلها بعام احد الجالسين على الخط كنت من الذين يندبون حظهم طول الوقت على الحكم الى بيطرد اربعه 4 من فرقتى الى هى المعارضه قبل الماتش وكان دمى بيتحرق جامد لما الاقى واحد من الى قاعدين جنبى بيقولى يستاهلوا حد قالهم يسخنوا على الخط

 ولا يجيبوا جون حلو كنت اقعد اناقشهم واحرق فى دمى ومفيش فايده هو مركب عينه القديمه وبيسمع بودن واحده هو مع الى يكسب وخلاص الراجل عاوز يفرح وده حقه بس على الاقل يفرح براحته بس ما يدورش على مبرر للحكم يقول انتوا لعبتوا كويس والحكم ظلمكم لكن هو عاوز يفرح ويرقص ويهلل ويبرر انجازات الفريق الى كسب باى طريقه ولا انكر اننى احيانا كنت افعل مثله بدون شعور لما فرقتى تكسب بحكم من دول

 لغايه ما حصل تبديل فى شهر فبراير عام 2010 الا وهو عوده اللاعب المحترف فى الوكاله الدوليه للطاقه الذريه محمد البرادعى واستقبال الناس ليه فى المطار الجرايد قعدت تكتب وتقول دا لاعب كوهنه وخلاص قعد من كام سنه وهيعمل ايه فى الدورى المصرى دا زى اى لاعب خلص وجاى يختم حياته وطمعان فى اى حركات لكن انا بصيت للموضوع بنظره تانيه ما يمكن الراجل ده بسبب احترافه يكون شاف طرق لعب مختلفه فى الحياه السياسيه وجاى ينقلها لنا المهم قعدت انتظر يوم مجيئه بفروغ الصبر واتمنيت اكون فى مصر اقابله فى المطار الراجل راح له 2000 واحد يقابلوه واعتقل فى السكه يجى 3 الاف والباقى خاف يروح

 قلت اما اشوف الخواجه ده ايه الى هيقوله لقيت الراجل بيقول كلام زى الفل وطلعمصر مش خواجه  بيقول ان ما ينفعش نلعب كوره ومفيش ملعب اساسا وان الحكم لازم يبقى مستقل فى قراراته ويحكم بالعدل وانه مش لاعب غير لما يجى حكم عدل ما يكونش تبع الناس التانيه طبعا اتحاد الكوره زعل والجرايد قعدت تكتب انه جاى يبوظ الكوره فى مصر

بس انا بصراحه حسيت ان الراجل ده بيقول كلام زى الفل قعدت اقرى الجرايد لقيت النقاد الى كانوا بيغنوا له من اسبوع ومشكلتى العويصه بقى والى تاعبه امى من زمان انى ما بانساش اى حرف قريته او اى موقف شوفته زى كل الناس الى اعرفها باحفظ كل كلمه الراجل الى كان عامله صفحه وبيحتفل بفوزه بجايزه نوبل امبارح ودوره فى حرب العراق لقيته بيقول دا هو الى خربها وان الجايزه هديه خرابها طيب ازاى يا عم انت دا كان لعيب جامد والله بس الفرقه الى كان بيلعب فيها الباك الجامد بتاعها فتح قناه لهجوم الفرقه التانيه مقابل سمسره ولما سالوه عملت كده ليه قالهم اصلى ماضى عقد فى القسطنطينيه

مش مشكله قلت افوت دى طيب والكاس بتاع احسن لاعب قالك اصل الراجل بتاع الجوايز امريكى قلت برضه مش مشكله المهم افتح جورنال تانى الاقى واحد كان بيقول دا صوفى ومتدين بيقول دا عربيد وديمقراطى وبيشتمه افتكرت علطول حمدى احمد وهو بيقول ديمقراطى يعنى كافر والعياذ بالله فى فيلم البدايه قلت افوت دى المهم بابص لقيت الراجل صاحب الفرقه الجامده الى معاها عصيان بيقول ده عيل اهبل ولو راجل يعمل حزب الراجل رد بادب هو فيه ملعب اساسا عشان انزل الاعبك خلى فيه ملعب وهات حكم عدل واحنا نلعب قام قايله خلاص انت حر الخلاصه الراجل ده عمل معايه ما لم يستطيع فعله اباطره الحياه السياسيه فى مصر خلانى اتحول من واحد من الى قاعدين على الخط زعلانين على حالهم الى عنصر داعم ومشارك خلانى احس ان كل كلمه باكتبها ليها معنى وان كل عضو بيزيد فى الجروب بتاعه بيكون ليه اثر فى التاثير على الراى العام وحط لكل الناس الى بتفكر زيى مطالب واضحه وصريحه وطبعا ده مكانش على هوى الحكومه فسلطت كتابها ورجالها ورجال الحزب الواطى وامن الدوله والحزب المتواطئ ضده الحزب المتواطئ هو امتداد طبيعى للحزب الواطى الحزب الواطى بيسرق والشرطه بتحرسه والحزب المتواطئ بيردد اى كلام يقولوه من غير ما يفكر يا نهار اسود يفكر يفكر ايه دا بيعمل كوبى وباست اساسا وهو مغمض لاى خبر تبعهم المهم انا مريت بلحظات احباط كتير وانا ماشى وراه خصوصا انه حط خطه

للوصول للهدف

اول حاجه نلغى الطوارئ انتظرت ما اتلغتش ولا حد عبرنا

تانى حاجه يبقى فيه تعديلات دستوريه تسمح لاى حد يدخل انتخابات ولا حد سمعه اساسا

جت الانتخابات قال نقاطعها لو معملوش تعديل للدستور

الكل مسمعش كلامه وصمم يدخل الماتش من غير حكم ولما اتغلب فى الشوط الاول 20 صفر لحق نفسه وانسحب من الماتش بس بعد ما ادى الماتش جزء من الشرعيه

بعد دا كله بدأت اشعر بالياس وقلت دا شكله خواجه ومش فاهم حاجه لغايه ما حصلت احداث تونس وثورتها العبقريه ساعتها بس حسيت ان الراجل ده كلامه صح ان العصيان المدنى والتظاهر السلمى هو الحل الوحيد الى فاضل عشان ترجع حقوقنا وفعلا بدات اتفاعل مع كلامه وابحث وادور عشان اعرف انه راجل لعيب من يومه وعمره ما خسر ماتش ولا خد صفر فى مونديال دا راجل كان بيدخل انتخابات بمجهوده الفردى ضد بلده بقياده احمد شاكر وامريكا واسرائيل وكوريا وبيكسب 33 صفر مش بيخسر قدام جنوب افريقيا 14 صفر ويرجع يقول اصل الفيفا متعشى

 رجل احترم رايه وكلمته فاحترمه خصومه قبل اصدقائه رجل بحث عن الحق ولم يخشى فى الحق لومه لائم ولا طبال ولا زمار فوقف الحق الى جانبه وبدات بقى الثوره بكل احداثها وحلوها ومرها وهو ثابت على مطالبها السبعه من البدايه للنهايه والشعب ملتف حول المطالب ويحقق المعجزه التى لم اكن اتوقعها ابدا فقد كان اكثر المتفائلين يتمنى حل المجلس عشان ترجعله الحصانه ويطلع فى قناه المحور او يتلغى الطوارئ عشان محدش يعتقله تانى وبعبقريه التوقيت استطاع رد الهجمه المرتده لعمر سليمان الى قال ان الثوره ثوره اخوان عشان يضرب تحت الحزام ويقول للغرب دى حماس جديده ويخوف المجتمع من تكوين ايران جديده فقام ممضى المرشد العام للاخوان على عقد على بياض ان الاخوان مش هيترشحوا للرئاسه وانهم لن يترشحوا لاكثر من 30% من المقاعد وبذلك ضمن ان الغرب لن يتدخل لصالح مبارك وان المنتفعين هيحاولوا يبقوا معاه على امل كرسى  او حتى رجل كرسى فى المجلس بصراحه الراجل ده لازم ياخد فرصته كامله ولازم نسمع كلامه لانى مصدقه وعمره ما وعد بحاجه وخلف ابدا  زى اريال كده دايما بيوفى بوعده

ايها الراقدون تحت اللحاف ارحمونا بقى

 قبل الثوره قلتوا على الى بيعتقل يستاهل عيل قليل الادب بيتكلم فى السياسه

والثوره شغاله قلتوا عاوزين يولعوا البلد

ولما الضرب اشتغل قلتوا شوفتوا البلد بتولع

ولما اترمى لكم عضمه قلتوا كفايه عليكم كده

ولما العضم كتر قلتوا انتوا طماعين انتوا عاوزين لحمه

ولما خلاص كل المطالب اتحققت اتاسفتوا للكلب واهنتوا الى واقف وما خافش يتعض ط\

ارحمونا بقى الفرح فرحنا والفرحه فرحه مصر عاوزين تيجوا ترقصوا تعالوا ارقصوا زى ما بقى لكم 60 سنه بترقصوا على جثث اولادكم وضياع حقوقكم

بس المره دى الفرحه ليها طعم فرحه حريه

تعبانين وحاسين ان المزيكا عاليه سدوا ودانكم وغموا عينيكم الى مش قادره تتحمل النور زى ما غطيتوا عينيكم وسديتوا ودانكم 60 سنه قبل كده

واخيرا وليس اخرا هناك فرق بين من لعب واثر وحرك القوى السياسيه وساعدها ووقف منذ البدايه فى الخندق وخطط وساعد بخطط جديده فى الثوره

وبين من انتظر طويلا على الخط ليشارك الفريق المنتصر افراحه وتحمله الجماهير على الاعناق بعد ان كان احد الشاهدين على ظلم الحكم واكثرهم عشقا لظلمه لانه كان سيصوت للرئيس مبارك لانه يعرفه جيدا  

بحبك يا مصر

بحبك يا مصر بروحى ودمى

 بحبك يا مصر فى فرحى وهمى

 باحبك يا مصر يا اهلى وامى

 باعشقك واعشق ترابك

دايما اسمك قبل اسمى

مهما زاد بعدى وعتابك

 بالقى نفسى بادق بابك

وافتكر لحظه بعادى

 وافضل طول الليل انادى

 كل تل وكل وادى

وانتظر دايما معادى

يوم رجوعى من بعادى

طول حنينى للرجوع

خلى كل اليوم دموع

بس برضه هاعود فى يوم

واستريح من الهموم 

يوم اكيد هيكون سعيد 

مهما الف واروح بعيد 

اصل حبك مالى روحى 

حب بيداوى فى جروحى 

ما انت عقلى وانت روحى

رباعيات صيدلى متغرب

انا باحب صلا ح جاهين الله يرحمه عم الناس جدا وباحب رباعياته لانها بصراحه بتتميز بعمق المعانى والتلخيص الرهيب الى بيتميز بيه وانا حاولت محاوله انى اعمل طقطوقات او رباعيات زيه بس يا جماعه انا باقلد الطريقه ولا ادعى لنفسى التميز يعنى اى موقف بيحصلى بالخصه فى جملتين ممكن يتماشوا مع بعض فى النطق لكن مين يقدر يوصل لواحد على الف من مكانه جاهين عم الناس

   كل واحد بياخد نصيبه من العذاب والهنا ولو مش مصدق شوف مر من العمر فى العذاب كام سنه كام واحده منهم مره وكام واحده منهم ضنا

 وعجبى

شربنا كاس العذاب من فرقه الاحباب عشنا فى بلدنا اغراب سافرنا وهاجرنا والجرح عمره ما طاب

وعجبى

 عاوز اكون انسان باحلم ببر امان صابر على الحرمان مهاجر بقى لى زمان لكن حبيبتى بتعشق انى اعيش فى هوان  ,وعجبى

 فى تزوير الانتخابات كتبت

تقفيل تقفيل تقفيل تهبيل تطبيل زمامير ابو جيمى الجن جايلكم مع ثوره التغيير والى يعارض حزبه هينام على المسامير اامر وانهى يا باشا واهو كله بالتزوير

وعجبى

يا سلام لو كلى كلام كنت اسهر ليلى ما انام

كنت انسى كل الامى مهما تاسى الايام

كنت ابقى زعيم ومناضل واقول للظلم حرام

وعجبى

ضاع من العمر فى الغربه كام سنه

بصيت لنفسى ما عرفتش مين انا

انا الى كنت عزيز بفقرى بدون غنى

والى الى صرت ذليل بالمال مين انا

وعجبى

انا مين وليه وازاى بقيت هنا

مصرى وعربى ومسلم ولا غريب انا

غريب فى بلدى وانكويت بالظلم 100 سنه

هاجرت جيت للعرب ما دقت يوم هنا

وعجبى

قلبى عليل بالم ونار وجراح

غريب بكيت واشتكيت فى كل ليله وصباح

بصيت ناديت للرفيق وقلت فين ارتاح

قالى يريت البكا كان جابلى عمرى الى راح

وعجبى

اسلامنا مات واندفن وفيه ناس كتير واقفين

عديت سالت فيه ايه قالوا جنيه او ريال عشان نجيبله الكفن

وعجبى

ندمان وقلبى اسير والحزن بحره كبير

زعلان على الماضى والهم جاى كتير

وعجبى

سرحت فى الفيس بوك وكتبت على الياهوووووو

فكرت انى بعدت وسرحت فى الملكوت

بصيت لقيت قدامى ابو جهل ويا اخووووووو

قلتله ايش تبغى قام قالى ايه ويش هووووووو

وعجبى

 فى حال مصر قبل يناير 2011

يا شعب اتعلم بقى بطل نظام البهوقه والشعلقه بطل نظام الفشخره دى مصر رايحه فى داهيه وحالتها خ0000 كل البلاد اتقدمت ومبارك جايبنا لورا كل البلاد اتطورت وحكومته نايمه فى الدره حتى السياحه مفيش سباحه والنيل هينقص بالسدود واحنا بدوره كوره عاوزين ننسى الشعب كل الى جرى والله ويا مصر بقيتى بين الشعوب المسخره

وعجبى

 اهداء لصاحبى مندوب دعايه فى تقفيل  الكوارتر

حبك تارجت حياتى وقلبى محروق فى حبك من يوم ما قابلت وشك وعقلى اتشنكل فى عشقك يا صنف ملوش بديل يا غزال ابيض جميل بيعك كده ليه قليل ما تضبط العميل(د مصطفى

ده تحوير لبيت المتنبى على مزاجى ومش هيفهم معنى الكلام ده غير الى عاش فى الرياض وعارفها كويس

انا الذى سخط البدوى على سعرى واعطيتى الحليب للبذر والورع الدخل والخرج والخزان تعرفنى والبر والروضه

والبطحاء والملز

تعليق على يوم غبار وانا فى الصيدليه

ايا ذا الشاكى وما بك داء كن جميلا ترى الرياظ جميلا
وترى الغبار فى الطريق وتعمى ان هذا يجعل الزبون قليلا
وتشتكى طول الدوام لوحدك وتنسى انك اجنبى دخيلاوليش معصب يا محمد روق وخلى بالك يا اخى طويلا
مع الاعتذار لايليا ابو ماضى

تعليقا على بطوله حوض النيل بعد فشل نظام مبارك فى التفاوض الدبلوماسى فلجا الى الكره الشئ الوحيد الى فالح فيه ونظم دوره حوض النيل

زرغطى يا فكيهه زمرى يا سعاد الارهاب راحل والفرح اهو عاد طبلى يا عديله زمروا يا ولاد دا شحاته بيلعب ولعيبته جداد بلاها فتاوى وبلاها حداد النيل كان ناقص بالكوره اهو زاد وبلدنا اتباعت جمله فى مزاد

تعليقا على مصطلح فى حب مصر الى انتشر على لسان المنافقين وازلام النظام البائد


 لمبارك

فى حب مصر باسرق بنوك بانهب تلال فى حب مصر بازرع واكبر فى الفساد فى حب مصر باصدر عماله للبلاد فى حب مصر بابيع فى ارضك فى المزاد فى حب مصر ايام ابوكو اكيد سواد فى حب مصر هاخليك تخاف تجيب ولاد فى حب مصرالشعب بقى زى الجماد فى حب مصر الحق بقى باطل ومات فى حب مصر هاكسر رقاب كل العباد فى حب مصر الشرطه ضربت فى البنات فى حب مصر الشعب فين  فى حاله سبات

(مصطفى دسوقى

 تعليقا على مظاهرات امناء الشرطه بعد الثوره لزياده مرتباتهم وادعاء انهم مظلومين وعلى راى المثل ضربنى وبكى وسبقنى واشتكى

السحت باين ع الوشوش ومستحيل اكون مغشوش ولا فيكو حتى وش بشوش ياما قتلتوا بريش منفوش عاملين ملايكه وانتوا وحوش فى الجيب دى رشوه ماليه كروش فى التانى قفل بيت مفشوش والدم ريحته ماليه الحوش

فخلاص يا باشا متحاولوش تبقى ملايكه وانتوا وحوش

اهداء لمظاهرات الشرطه بعد ثوره مصر

تعليقا على اتهامات وائل غنيم وكل شباب الثوره بالعماله

كل البلد عملاء وانا اول عميل واى حد يقول لمبارك غورطبعا هتقولوا عميل مع اننا سوا شاربين من نفس النيل مع اننا مسلمناش غازنا لاسرائيل كله كلام فى الفاضى عايم بدون تحليل مع ان دليل خيانه رئيسك بقتل شعبه يا صاحبى اكبر دليل انصحكم نصيحه واحده غطوا  رجليكم  بالليل

تعليقا على اتهامات العماله لكل رموز الثوره كثوره مضاده

تعليقا على حمله احنا اسفين يا ريس والعادلى هو السبب

لا تذبحوا المأمور وتقدسوا الأمر

بل حاسبوا الكلبين فكلاهما فاجر

لا تسجنوا النصاب وتتركوا القاتل فالكل فى اللعبه ضلع ومتأمر

لا تشتموا المظلوم وتتركوا الظالم فالظلم بالقول فعل مشين سافر

مصطفى دسوقى

 تعليقا على حمله عيب ده راجل كبير

الى صعبان عليه مبارك وشلته وقلبه حنين يروح يجرب ويخليهم يموتوا له من عياله عيل

زجال انا زجال

 باكتب وهاوى ارتجال

باكتب كلام للرجال والعيال

باوصف شجونى بقلم وباسطر الاحوال

يمكن فى يوم تقروه يمكن يكونلى مجال

وعجبى

 باكتب كلام وحكاوى باكتب لسانى طويل

ممكن تقول ازجال وممكن تقول مووايل

كلام  يجيب الامل وكلام يجيب الويل

وفى يوم سكت ونمت وصحيت لقتنى عليل

قلت الكلام لو خلص راح  تعمل ايه يا جميل

وعجبى